ای شائے نہ پُرسان دَورا حال بوسیان۔ لہازی ریکو شیکین شینی مگم پریشانیان کیہ نس نکی۔ اکثر روئے ہانی زیاد پریشان بونیان کی زندگیو سار بریکو تانتے شیرین جاݰونیان۔ ہیہ دوݰ تان ای بو مشہور انڈیو ایکٹر تان سورو ماریتائے کی نو ہتوت کیاغو کمی؟
لہذا لو ہیہ کی ذہنی دباؤ کیاغ بیکوچے نو بیکو سُم تعلق نو شک بیرائے وا ہر کا مختلف وجوہاتین ذہنی دباؤ اشکار باک بیرانی۔
ݯھتراتو روئے بو زیادہ ایغو خیالو لاکھاک وا بو رخمگین روئے مگم ہیسوم جوستہ بو دُورین جوان اژیلی اوچے نان تت تان موژی لو تان نو دونی۔ څیڅیق اسپہ ژانو نس بونی مگم کیاوتکی ہے څیڅیق پُھک جوان ہونی ہیتان زندگیہ بو قسمہ تبدیلی گویان وا ہیت ای خور زمانہ حال بیکو وجہین کیاوت کیاوت نان تتان توقعاتان پورا کوریکو نو بونیان ہیغین دیتی نان تت ہے اژیلیان سُم فروخ ݯوکتو کونیان۔ ہردیہ خواہ مخواہ ہیتان بچے بو محبت بویان مگم دُوری ایغو نسہ نیشی لو دیک نکی۔
ہے قسمہ تان اسپا ژیژاؤ خاص کوری پھُک لوٹ بیکو سُم وا دُوری کوس نسہ ہردیو لوؤ دیک ریکو پھائے رو شار عام کیہ مشقولگی دی نو کونی۔ ۲۰ سالار گانی ۵۰ سالا بیکا پت کولانان ای نمونہ روپ تان دُوری رویان سُم صحیح لو نو دونی خاص کوری نن تتان سُم۔ ہیہ وجہین ای رابطو خلا پیدا بویان کیاغ کی رویان ایغو سار آرامہ آرامہ دودیری کویان۔ جو بسہ ہے نان تت کی ہیہ دنیار بغانی یا ہے ژاؤ یا ژور کی تان سورو کُو دریتائے وا ہش کیہ فائدہ نکی۔ نوجوانان دی پُھک گنجائش کوری تان دُوری رویان سُم لو دیلی، ہیتان نسہ نشیلی وا نان تتان دی اژیلیان لووانتے کار کوریلی۔
ہنون ہمی موبائل اوچو نیٹ نیسیکار اچی تھے دنیا تونج تان بیشیر۔ ݰاپکو ٹیمہ دی کیا ایغو سُم لو دیکو راہ نکی۔ ایغو نسہ بیتی دی دودیری بیک ہموتین ریر!
اوا تان موژی ایغو سُم لو دیکو سورا ہتیغین زور دومان کی انسان کوسُم کی تان لوؤ دیکو نو بیتائے ہسے غیژی بویان وا ہیس ذہنی دباؤو اولانو وجہ۔ اژیلی وا دی نیٹہ اوچے موبائلا ای فرضی دنیا ای قسمہ دلاسہ بونیان مگم زارو نن تا وا واؤ بپان سُم لو دیاک تان کا نکی۔ ہیہ نستو زمانہ دی نو کی روئے کوس دُورین بوغاؤ اوشونی یا مینو گیاؤ اوشونی، ہنیسین تان دُوری رویان خیالو لاکھیکو بو ضرورت شیر۔ اژیلیان اوچے نان تتان موژی کیا پولوغ کی شیر ہو زراٹھیلی وا تان لووان ایغو سُم دیلی، کوریکو کی روئے رویو ویز!
اسپت اندازہ نکی کی اسپہ ای کما اپاک لو کوس غیژی گاریو کندوری ختم کویان وا ہسے کی صرف تان لووان پرائے وا تو کی ہتوت کار تان ارو ہتو ذہنی دباؤ کندوری کم بویان۔ نان تت اوچے اژیلیو موژی دوستانہ تعلق بیلی وا عزت مݰکاک دی ہے تعلقہ بو عزت لیر۔ تہ سار کا کی بوہتی عزت اریر ہسے عزت کوریک نو صرف مجبوری۔ امید شیر کی ہیا لاک ڈاؤنو موژی اسپہ تان دُوری رویان سُم ݰوئے بوسی، ہتیتان تانتین پیݯ جاݰوسی وا ہتیتان لووانتین کار کوسی، کوریکو آخر انسانو خاندان ہتو خاندان وا، تان جمو یا شومو اسپتے کا دوئے۔
