طرز زندگیکالم نگار

پی کے – 661 وا ݰا انوس

جُو ہزار اوچے جوش ݯھوئے عیسویو دسمبر مَس، چُھوئین اوݰاکی اکریݯِیران، بوتہ اوچے چُھوچہ بیری نیسیکو

ہم نے MIER اور زین الملک کا شکریہ اداکرتے ہیں ہے کہ انہوں نے چمرکھن کو یہ مضمون شائع کرنے کی اجازت دی۔ آرٹیکل کی ویڈیو کے لئے ہم وسیع الدین آکاش کا شکریہ اداکرتے ہے۔ براہ کرم فیس بک پر MIER اور Wasi Uddin Aakash پیج ضرور لائیک کریں
جُو ہزار اوچے جوش ݯھوئے عیسویو دسمبر مَس، چُھوئین اوݰاکی اکریݯِیران، بوتہ اوچے چُھوچہ بیری نیسیکو کار چِھیاؤ بینیان، ہوست قَف بیتی وا زیناخ دوڑی بہچوران۔ چِلاہ ݰوئیکو روئے یومُونو بندوبستہ اسونی تاکہ جُو ہفتہ اچہ گیاک درونگار چِلاہو زریخئیاری تان سورو کیہ قسمہ محفوظ ساتینی۔ قشقار بطھنہ یومُونی کی ہائے عام طورا اکھابیرانان وا څیڅیقان سُستئیر۔ ہیغین دیتی انگارو بچین دار، قالبو بچے امبوخ پیݯ وا بوسک چالائے، ژیبیکو بچین گرم وا امبوخ ژیبارُوم بڑاڅھئیک بو ضروری، کو ریکو کی افاری گیاک کُھلی اشناری بند بونی وا امبوخ ہیم کوریکو وجہین راہ بند بیکو دی خطرہ بوئے۔ پون آزاد دی کی اوشوئے یوزا وا توقہ ٹھور بیکو خطرہ اوچے تکلیف بو زیادہ۔
سوت دسمبرو چھوچی دی آسمانہ یور تان تمام آب و تابو سورا یی نیسی ݱانگ ݱانگ زومان پھورین شیرو ݰایوزان وا ہیمان سورین تان ݰئیلی ݰخران وا روشتیو بݯھارائے اریر۔ آسمان یُودُور بیکین دیتی چُھویو وا چُھوچیتی اُوݰاکی کٹر کوراؤ اوشوئے۔ البتہ یور توریکار اچی اوݰاکی ختم باؤ ہائے وا پست ژاغین اسُور اوچے یوز بُوروواؤ ہانی۔ کوس کیہ عمل وا کوس کیہ کھاسپ، روئے تان کورمانتین اَف نیسانی۔
درُونگ انوس ہے گہماگہمیہ پھار شوخڅی پِیشینہ افاری جہاز گیتی ݯھترارو جہازو لشٹہ یُو خومیتائے۔ افار گیرو پھتی رویان دُورو روئے وا بِیرو ہتیتانتے پرُوشٹ گیتی اسیتانی وا ہتیتان گوڑی ݯوکی دوچھار باؤ یا ݯانگ باؤ تان ہردی پھتیان نیزیکا پرانی وا ہے تمام مسافر خوشان خوشان تان دُورانتے راہی ارینی۔ ہݰ تان چقہ افوت بوغاک روئے دی تان دُورو رویان، تان بیرووان وا تان دوستانانتے خدایار کوری، ݰاؤ اچی پاشیسی رے جہازو ووݰکی بغانی۔ نماز دیگرو ݰویہ جہاز ݯھترارار ایہہ اوسنیتائے۔ جہازی نیشیرو کندوری روئے کھڑکیہ یُو کوری لوڑیرو بونی وا تان دُوران، بیرووان وا ملگیریان دُوران، کورمو وا کوسیرو ژاغان وا تان تت بطھنو ݯُھوتیو بار بار لوڑیرو بونی۔ ایہہ دُورین اسیرو وا اف انتظارا اسیرو ہیتان خیرو سورا تان منزلہ توریکو دُعا مݰکیرو بونی مگم کوستے کیہ معلوم اوشوئے کی ہنون کاتِبِ تقدیر کیاغ پاشیران رے۔
شام ݰویہ ݰا خبر کُھلی دُنیو کارا توریتائے کی ݯھترارار اسلام آبادوت بوغاک جہاز (پی کے – 661) پونہ حویلیانو ݰویہ یُو غیریتائے وا ہے جہازی اسیرو تمام مسافر وا جہازو اِسٹاف، جُو بیشیر سوت نفری سف شہید ہونی رے۔ ہے انوسو ہتے ݰئیلی وا یورو روشتی یک دم تب گیر بیتی بغانی وا دُنیا سورار مُوڑ بِیرؤو غونہ بیتی غیچی ہائے۔ ہیہ خبر اسپہ کارا کیہ توریتائے، سف واری وق بیتی بغاتام۔ ہݰ سارئیتائے کی جہازی نیشیرو روئے صرف ای کما دُوران اژیلی نو بچومکہ ہیت کُھلی کھو قومو وا پُورا ݯھترار بطھنو اَژیلی۔ ہے اَنوس اسپہ ہے ای کما دُورین تان روئے لیے نو کیڑیتانی بلکہ پُورا ݯھترار وا پُورا پاکستان ماتم اریر۔ ہݰ سارئیتائے کی ہے انوس ݯھترارو تمام زوم، سِین، کان لواش، دار بوہت وا بوئیکرا اسپہ سُم ای بیتی کیڑینیان۔ ہیہ کھو قمو تاریخہ سفان سار ݰا اَنوس وا ݯھترارو سفان سار لوٹ سانحہ اوشوئے۔ کا کیہ گُمانہ وا کا کیہ انتظارا اسیکا آسمان چھیتی اسپہ سورو خومیتائے وا دنیا اسپتے قیامت بِیرؤو غون ہوئے۔
ہے جہازی نیشیرُو رویانتے جہاز خراب بِیکو لُو معلوم بیکو ہتیتان کیہ حال بیرو بوئے وا ہتیت تان خدایو نامئے کندُوری دُعا مݰکیرو بونی؟ ہتیتان دُورو روئے کندوری ہتیتان ذہنہ گیرو بونی؟ جہاز یُو غیری ژان ایہہ نیسیکا پت ہیتان کیہ حال بِیرو بوئے؟ ہَمی لُووان بارا کی دونین بویان تھے ہے معصوم شہیدانانتے مزید ژان پُولیران، اسپہ جگر ورینݮونیان، ہردی تریز بینیان وا اسپہ اوان ہمیشہ اشروار کھیچ بیتی غیچی گویان۔
ایہہ ݯھترارتو شہیدانان دُورین روئے خومیک شروع ارینی وا اف حویلیانو ݰوئے شہرین اسِیرو روئے جہاز یُو غیریرو زومو وا ایوب میڈیکل کمپلیکس ایبٹ آبادو ووݰکی راہی ارینی۔ ہیتان ہردیہ ہیہ امید اوشوئے کی ممکن شیر اسپہ ہے خوش بیرو کیہ ژونو تان یُو غیریرُو بونیہ یا ہیتان جسد خاکیو کی الانی کیہ ہوݰ کوری تیز تان دُوروتین الیکو بوسیہ رے۔ مگم خالقوتین خُور کیاغ مقصود وا منظور اوشوئے۔ ہے درونگ وا آزمائشو ݰا چُھوئے اسپہ سفان بچین انتہائی تکلیفہ پھار شوخڅیتائے۔
چھوچی بیکو معلوم ہوئے کی سفان اسلام آبادو پاکستان انسٹی ٹیوٹ آف میڈیکل سائنسز (پِمز) اسپتالہ بوغیلیک تاکہ تان شہید بِیرووان وا ہیتان وارِثانان قالبو حصان وا لییو نمونان ڈی این اے ٹیسٹو ذریعا ایغو سُم نیسِکو مرحلو کورین بوئے وا ہیہ مرحلہ جُو ہفتہ پت تان انجاموت تاریر رے۔ ہیہ اسپہ سفان بچے یقیناً وا ای خُور لوٹ امتحان اوشوئے۔ کوس بِیرو کی اف اسیتانی ہتیت ݰاؤ ہتیرا توریتانی وا کوس بِیرو کی ایہہ ݯھترارتو اسیتانی، ہتیت مزید جسمانی وا ذہنی تکلیف خیݰی اسلام آبادا توریتانی۔
اسلام آبادو وا ہے ݰوئے ژاغین اساک ݯھتراری، گلگتی وا خُور ژاغو روئے، سیاسی قائدین، مذہبی جماعتو نمائندہ گان، اخباری نمائندہ گان وا سول سوسائٹیو روئے ہے پمز اسپتالہ گیاؤ شہیدانان لواحقینان سُم بو ݰئیلی غم بوژیتانی۔ چائے، اوغ، ݰاپیکو وا بِستران بندوبستو ارینی، وا ادبہ سفانتے بو حوصلہ پرانی مگم ہتے وختو حکومتو ووݰکیار کیہ قسمہ کی غفلت پوشونو ہوئے ہتو دی مثال لیک مشکل۔
ای کما بس اَچہ ایگان باؤ ٹیسٹان نتیجہ ہانی۔ خُور ژاغو روئے تان شہید بیرووان جسمان گاناؤ اوانی وا ݯھتراریان بچے ای جہاز دیونو ہوئے وا کُھلی شہیدانان تیتان دُورین تارئے ہزار ہا اشرو غیچی رویان پرُوشٹہ ہیتان پوتُھور کوریکو آسمان دی اسپہ سُم ای بیتی کیڑیکا پرائے۔ ہیتان شہید بیکار گانی ہیتان جسد خاکیان انگیتی کھاڑئیکا پت ہے وخت یقیناً اسپہ تمام رویان وا اسپہ بیرووان اوچے خوش داراکان بچے خدایو ووݰکیار ای لوٹ آزمائش اوشوئے۔ مگم ݯھترارو ݰئیلی روایاتان امین روئے ہے مشکل وختہ اسپہ سُم ای بازؤو چَقہ رُوپھی غم بوژیتانی وا اسپہ غیژی نو پیڅھی اسپتے حوصلہ پرانی۔
ہے حادثا ݯھترارو رویان ہرونی متاثر اریر کی درُونگ یومُون نیسیکا پت روئے شوخ نو چھینیتانی وا کیہ دی قسمہ اشٹوک، ثقافتی پروگرام وا قافیہ کوری ہوسیکو دی روئے معیوب جوݰیتانی۔ ہیہ حادثہ ݯھترارو تمام رویان ای قوم ساٶزئے سفان غیچی اشرو کاسیتائے وا ہنون چھور سال پھار شوخڅیکار پویہ دی ہیہ غمار نسیکو نُما بونی۔
اِسپہ سف بریکو بندہ گان وا بریک سفو سورا فرض۔ کا کیہ قسمہ لہاز بیتی برییور وا کا کیہ قسمہ ݯھیک ژُونی بیتی۔ ہیتان بچین ہیتان بِیرو پرُوشٹاری تان ذہنی طورا تان سورو تیار بہچینی۔ مگم ہیہ جہازو یو غیرِک تھے اسپہ بچے ای لوٹ قیامت اوشوئے۔ خدائے ہموݰ ناگہانی آفت کوس سورا دی مو انگیئار۔ آمین!
ہیہ حادثار اچی ہتے وختو پاکستانو قومی اسمبلیو ݯھترارو نمائندہ شہزادہ افتخارالدین اوچے عدنان زین العابدین (کی ہورو څیق برار سلمان زین العابدین دی ہے بد قسمت جہازہ تان ژانو پیژیمی شہید بیتی اسیتائے) بیرسٹر شہزادہ اسد الملکو وکالتہ پشاور ہائی کورٹہ تمام شہید بیرووان دُورو رویان ووݰکیار کیس داخل کوری ہیہ حادثو بنیادی وجہو تفتیش کوری وا ہے رپورٹو رویان پروشٹہ انگیکو عرضیو ارینی۔ پشاور ہائی کورٹو جج صاحبان جسٹس اکرام اللہ اوچے جسٹس اعجاز انورو سربراہیہ ہیہ حادثو رِپورٹ عدالتہ جمع کورونو ہوئے۔ ہے رپورٹو مطابقہ جہاز اسلام آبادار ݯھتراروت راہی کوریکار پروشٹی تان جازیر بیرائے وا ہے انُوس ݯھترارار اچی راہی کوری پُھک مُدا ہو انجن بند بیتی شیر، وا پائلٹ ہے جہازو کنٹرول کوریکو نو بیتی کُورا آبادیو سورو غیرئے مزید تباہیو سار بچ کوری التی ہے جہازو حویلیانو زومو غیرئیتائے۔
لوڑیکو ہیہ ای حادثہ ساریران مگم ہیہ ای حادثہ نو بلکہ جہازو قومی کمپنیو غفلت، لا پرواہی وا اسپہ معصوم رویان زندگیان سُم اِشٹوک کوریکو ای بو شوم مثال۔ ہے جازیر جہازو وجہین ہے نیشیرو ہے ای کما ژُون تان شہید نو ہونی بچومکہ ہیتان سار اَچی اسِیرو ہیتان نان تت، اَژیلی، برارگینی، اسپڅار گینی، موش گینی، بوک گینی، خُور اویژا، یار دُوستان وا کندُوری خُور روئے ذہنی طورا مفلوج وا دنیاوی طورا بو زیادہ متاثر ہونی۔ بدقسمت جہازو (پی کے – 661) شہید بیرُو، کندُوری رویان غیچھان روشتی، ہردیو سکون، بازؤو طاقت وا اکھابیریو سہارا اوشونی۔
کیہ حکومت یا پی آئے اے ہے رویان غمان دُودیری کوری ہیتان جائز حقان ہیتانتے دیکو بویہ؟ بوغدو چھور سالاری اسپہ ہر انُوس لیے اشرو کیڑیسیان۔ کیہ ہے اشرووان قیمتو کا پُورا کوریکو بویہ؟ نان تتان وا اژیلیان غیچ ہمیشہ تان خوش رویان بچے راہہ ویسی بہچی شینی وا ختم نو باک غم ہمیشو بچین ہیتان سُم جوست ہونی۔ اورارُو پُولوئی، جگرا لیے ݯھوݯو ہوئے، ہے قیمتان کا ادا کوریکو بویا؟ اِسپڅارگینیان بازووان طاقت، اے مہ شیرین کائے رے ہیتان گوڑی ݯوکاک برارگینی پَھت بیروو غونہ کُوئی غیری بغانی، ہے اِسپڅارگینیان خیر اوچے خوشانیو دعان کا مَݰکِیر کیہ؟

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button